Diaqnostika
MRT müayinəsi
Nə üçün aparılır: Beyin, onurğa, oynaqlar, yumşaq toxumalar, daxili orqanlar.
24/7, gecə üçün əvvəlcədən qeydiyyat
- Gecə-gündüz
MRT nədir?
MRT (maqnit rezonans tomoqrafiya) güclü maqnit sahəsi və radiodalğalar vasitəsilə bədənin daxili strukturlarının ətraflı təsvirini yaradan müayinədir. Rentgendən fərqli olaraq ionlaşdırıcı şüalanmadan istifadə etmir. Beyin, onurğa, oynaqlar və yumşaq toxumalar kimi strukturları qiymətləndirmək üçün xüsusilə informativdir.
Alyans Clinic-də hansı MRT müayinələri aparılır?
- Baş və beyin MRT-si
- Onurğanın MRT-si (boyun, döş və bel şöbələri)
- Oynaqların MRT-si (diz, çiyin, bud-çanaq və digər oynaqlar)
- Yumşaq toxumaların MRT-si
- Daxili orqanların MRT müayinəsi
MRT nə vaxt təyin olunur?
MRT-ni həkim şikayətlərinizə və müayinənin nəticəsinə görə təyin edir. Məsələn:
- tez-tez təkrarlanan və ya xarakteri dəyişən baş ağrıları, başgicəllənmə;
- bel, boyun ağrıları, əl-ayaqlara yayılan ağrı və keyimə (yırtıq şübhəsi);
- travmadan sonra davam edən oynaq ağrısı, şişkinlik, hərəkət məhdudluğu;
- nevroloji şikayətlərin, qıcolmaların səbəbinin araşdırılması;
- digər müayinələrdə şübhəli dəyişiklik aşkar edildikdə.
MRT-dən əvvəl nəyi mütləq bildirməlisiniz?
Aşağıdakı hallar MRT-ni həmişə qadağan etmir, lakin əvvəlcədən qiymətləndirmə tələb edir. Qeydiyyat zamanı və müayinədən əvvəl mütləq deyin:
- kardiostimulyator (pacemaker), implantasiya olunmuş defibrilator, koxlear implant, neyrostimulyator;
- metal implantlar, damar klipsləri, stentlər, süni oynaqlar;
- bədəndə, xüsusilə gözdə metal qəlpə ola biləcəyi ehtimalı;
- hamiləlik və ya hamiləlik ehtimalı;
- qapalı yer qorxusu (klaustrofobiya);
- böyrək xəstəliyi və əvvəllər kontrast maddəyə allergiya (kontrastlı müayinə təyin olunarsa).
MRT-yə necə hazırlaşmalı?
- Bütün metal əşyaları çıxarın saat, zinət əşyaları, kəmər, saç sancağı, eynək, açar, telefon, bank kartı, çıxarılan protezlər. Güclü maqnit sahəsi metal əşyaları özünə çəkir; bu həm təhlükəsizlik, həm də təsvirin keyfiyyəti üçün vacibdir.
- Metal hissəsi olmayan rahat geyim seçin.
- Daimi qəbul etdiyiniz dərmanlar və xroniki xəstəliklər barədə həkimə məlumat verin.
- Əvvəlki MRT, rentgen və USM nəticələriniz varsa, özünüzlə gətirin.
- Kontrastlı müayinə təyin olunarsa, aclıq və digər hazırlıq qaydalarını qeydiyyat zamanı dəqiqləşdirin.
Müayinə necə keçir?
Xüsusi masaya uzanırsınız, masa cihazın içinə hərəkət edir. Cihaz işləyərkən döyülmə və vızıltıya bənzər səslər çıxarır; bu, normaldır. Görüntünün aydın olması üçün müayinə boyu tərpənməmək vacibdir. Müayinənin müddəti müayinə olunan nahiyədən asılıdır və adətən 15–45 dəqiqə çəkir. Görüntüləri radioloq qiymətləndirir və yazılı rəy hazırlayır.
Alyans Clinic-də MRT
- Klinikada Siemens istehsalı 1.5 Tesla gücündə MRT aparatı işləyir.
- MRT kabineti gecə-gündüz işləyir. Gecə saatlarında müayinə üçün əvvəlcədən zəng edib qeydiyyatdan keçmək mütləqdir.
- MRT uşaqlar üçün də aparılır; uşağın yaşına görə hazırlıq qaydasını qeydiyyat zamanı öyrənin.
- Radioloji şöbəyə MRT mütəxəssisi Pərvanə Məmmədova rəhbərlik edir.
- Qiymət və aktual kampaniyalar barədə məlumatı qeydiyyat şöbəsindən alın.
Tez-tez verilən suallar
MRT ağrılıdır?
Xeyr. Müayinə ağrı yaratmır. Yalnız bir müddət hərəkətsiz uzanmaq və cihazın səsi bəzi insanlar üçün narahatedici ola bilər.
MRT-yə göndərişsiz gəlmək olar?
MRT-nin hansı nahiyəyə və hansı protokolla çəkiləcəyini həkim müəyyən edir. Göndərişiniz yoxdursa, əvvəlcə klinikada müvafiq ixtisas üzrə həkim qəbuluna yazıla bilərsiniz.
Qapalı yerdən qorxuram. Nə etməliyəm?
Bunu qeydiyyat zamanı mütləq bildirin. Həkim sizinlə vəziyyəti müzakirə edəcək və müayinəni necə keçirməyin uyğun olduğunu izah edəcək.
