Kolonoskopiya

Kolonoskopiya nədir?

Kolonoskopiya yoğun bağırsağın daxili səthinin ucunda işıq və kamera olan elastik boru ilə müayinəsidir. Müayinə zamanı aşkar olunan poliplər çox vaxt elə həmin prosedurda götürülür, şübhəli sahədən biopsiya alına bilər. Prosedur adətən sedasiya (yüngül yuxu vəziyyəti) altında aparılır, buna görə narahatlıq minimal olur.

Kolonoskopiya nə vaxt lazımdır?

• uzun müddət davam edən qəbizlik və ya ishal;
• nəcisdə qan;
• səbəbi bilinməyən qarın ağrıları;
• səbəbsiz çəki itkisi və ya dəmir çatışmazlığı anemiyası;
• polip və ya şiş şübhəsi;
• yoğun bağırsaq xərçənginin erkən aşkarlanması məqsədilə profilaktik müayinə — xüsusilə ailədə bağırsaq xərçəngi və ya polip olan şəxslərdə.

Profilaktik kolonoskopiyanın sizin üçün hansı yaşdan və hansı intervalla lazım olduğunu həkim risk amillərinizə görə müəyyən edir.

Bağırsaq hazırlığı nə üçün vacibdir?

Bağırsaq təmiz olmadıqda həkim selikli qişanı tam görə bilmir və müayinənin təkrarı lazım gələ bilər. Ümumi qaydalar:

• 1–2 gün əvvəl: lifsiz pəhriz (ağ çörək, düyü, makaron, yumurta, toyuq əti); meyvə, tərəvəz, paxlalılar, qoz-fındıq, toxumlar və tam taxıllar qəbul edilmir.
• Bir gün əvvəl: yalnız şəffaf mayelər (su, çay, bulyon, şəkərsiz kompot).
• Bağırsaq təmizləyici məhlul həkimin verdiyi yazılı təlimata uyğun vaxtda içilir.
• Qan durulaşdıran və şəkər əleyhinə dərmanlar barədə həkimə əvvəlcədən deyin.
• Sedasiyadan sonra həmin gün avtomobil idarə etməyin; müayinəyə yaxınınızla gəlin.

Müayinədən sonra

Bağırsağa verilən havaya görə qarında köp və qaz hissi ola bilər; bu tez keçir. Həkim müayinənin nəticəsini dərhal izah edir. Polip və ya biopsiya nəticəsi bir neçə gün sonra hazır olur. Polip götürülübsə, növbəti nəzarət müayinəsinin vaxtını həkim təyin edir.